9
ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤀᤥᤒᤠ ᤛᤣᤘᤠ ᤆᤥ᤺ᤰᤔᤠᤴ
1 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱ ᤏᤢ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤌᤡᤰᤛᤡᤃᤣ᤺ᤰᤛ᤻ᤔᤠ ᤔᤠᤱᤜᤢᤵᤐᤥ ᤛᤣᤘᤠ ᤆᤥ᤺ᤰᤔᤠ ᤌᤡᤶᤜᤠ᤹ ᤘᤕᤧ. ᤜᤧᤰᤁᤩᤠᤱ ᤀᤡᤰᤛᤠᤀᤥ ᤛᤣᤛᤣᤒᤠ ᤋᤧᤴᤏᤠᤱ ᤏᤧᤛ᤻ᤛᤧᤖᤥ॥
2 ᤂᤧᤴ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤥ ᤏᤧᤳᤇᤡ ᤕᤠᤰᤑᤠ ᤏᤧᤛ᤻ᤛᤧ॥ ᤂᤧᤵᤔᤥ ᤌᤡᤰᤛᤡᤃᤣ᤺ᤰᤛ᤻ᤔᤠ ᤕᤠᤰᤑᤠᤀᤥ ᤛᤣᤔᤡ ᤕᤢᤱᤍᤧᤴ. ᤆᤵᤋᤧᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤛᤣᤛᤣ ᤂᤖᤧ᤺ᤱᤜᤠ᤹ ᤏᤧᤛ᤻ᤛᤧ॥ ᤁᤴ ᤋᤧᤴᤏᤡᤴ ᤛᤣᤛᤣᤒᤠ ᤋᤧᤴ ᤔᤧᤔᤧᤳᤋᤢᤖᤥ॥
3 ᤜᤧᤰᤁᤩᤠᤱ ᤂᤧᤵᤔᤥ ᤑᤥ᤺ᤴᤍᤠᤎᤡᤰ ᤐᤳᤇᤧ॥ ᤂᤧᤴ ᤑᤥ᤺ᤴᤍᤠ᤺ᤸᤗᤧ ᤌᤣ᤺ᤰᤋᤢᤒᤠ ᤏᤡᤛᤡᤃᤣ᤺ᤰᤐᤠ ᤕᤠᤰᤑᤠ᤺ᤴ ᤁᤠᤰᤏᤢ᤺ᤸᤗᤧ ᤛᤣᤛᤣᤒᤠ ᤋᤧᤴ ᤔᤧᤔᤧᤳᤋᤢᤖᤥ॥
4 ᤂᤧᤵᤔᤥ ᤛᤠᤶᤔᤩᤠᤱ ᤛᤠᤱᤛᤡᤱ ᤜᤠ᤺ᤶᤔᤠᤍᤧᤴᤎᤡᤰ ᤏᤢ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤔᤏᤠᤒᤠ ᤔᤠᤱᤜᤢᤵᤐᤡᤸᤗᤧᤴ ᤛᤴᤍᤥ᤺ᤰᤁᤡᤴ ᤕᤢᤅᤧ॥ ᤜᤧᤰᤁᤩᤠᤱ ᤂᤧᤴ ᤛᤴᤍᤥ᤺ᤰ ᤛᤡᤃᤠᤱ ᤔᤴᤏᤠ ᤁᤧᤕᤠᤰᤐᤠ ᤛᤠᤶᤔᤩᤠᤱ ᤂᤵᤐᤩᤠ᤺ᤴ. ᤁᤢᤑᤧᤰᤔᤣ᤺ᤳ ᤁᤧᤒᤵᤐᤠ ᤜᤠᤖᤢᤏᤖᤧ ᤁᤢᤍᤰᤁᤠ᤺ᤳᤋᤡᤴ ᤏᤢ ᤌᤡᤒᤥ᤺ᤱ ᤛᤠᤶᤕᤥ ᤀᤡᤱᤈᤠ᤺ᤱ ᤁᤧᤒᤵᤐᤠ ᤔᤠᤱᤜᤢᤵᤐᤡᤸᤗᤧᤴ ᤗᤢᤱᤛᤠᤵᤜᤠ᤹ ᤕᤠᤃᤧᤖᤥ॥
5 ᤂᤧᤴ ᤛᤴᤍᤥ᤺ᤰ ᤛᤶᤍᤠᤱ ᤁᤖᤢᤒ ᤔᤧᤵᤔᤏᤠᤒᤠ ᤔᤡᤔᤡᤍᤡᤱᤃᤧᤴ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤒᤪᤡ᤺ᤵᤐᤠᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥ᤺ᤔᤠ ᤋᤧᤴᤏᤡᤴ ᤀᤡ᤺ᤵᤋᤧᤳᤇᤢᤀᤠᤱ ᤕᤧᤒᤧᤳᤇᤡᤖᤥ॥ ᤁᤖ ᤀᤠᤸᤗᤥ ᤁᤴ ᤁᤠᤰ ᤐᤠ᤺ᤴᤜᤠ᤹ᤃ ᤀᤠᤏᤡᤃᤧ ᤏᤢ᤺ᤖᤡᤰᤁᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤶᤒᤧᤴᤗᤥ॥
6 ᤀᤠᤸᤗ ᤁᤠᤰ ᤁᤴ ᤐᤠ᤺ᤴᤜᤠ᤹ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤌᤡᤰᤕᤠ᤺ᤴᤎᤰ ᤂᤧᤴ ᤗᤠ᤺ᤰᤁᤠᤳᤐᤠ ᤛᤣᤛᤣᤒᤠ ᤋᤧᤴᤏᤥ ᤔᤠᤱᤛᤣᤘᤠ ᤆᤥ᤺ᤰᤛᤧ ᤔᤧᤗᤠ᤺ᤛᤧ॥
7 ᤁᤖ ᤛᤡᤃᤠᤱ ᤗᤧᤵᤔᤠᤱᤒᤠ ᤁᤠᤰᤏᤢ᤺ᤸᤗᤧ ᤛᤣᤛᤣ ᤋᤧᤴᤏᤥᤃ ᤔᤠᤏᤡᤱᤘᤠ᤹ᤑᤢᤛᤠᤶᤒᤧᤴᤗᤰ ᤋᤱᤒᤣᤖᤧ ᤌᤡᤰᤗᤧᤱ ᤔᤠᤰᤂᤡ᤹ᤏᤢ ᤗᤠ᤺ᤛᤧᤖᤥ॥ ᤂᤧᤴ ᤔᤠᤰᤂᤡ᤹ᤀᤡᤱᤃ ᤂᤢᤏᤧ᤹ ᤀᤠᤒᤠᤅᤣ ᤁᤢᤗᤠᤕᤥᤖᤧ ᤗᤠᤃᤡ ᤏᤢ ᤔᤏᤠᤜᤠ᤹ᤖᤧ ᤔᤧᤴᤏᤡ ᤔᤧᤸᤗᤧᤀᤣ ᤔᤧᤈᤥᤃᤢᤒᤠ ᤗᤠᤕᤥᤜᤠ᤹ ᤗᤧᤵᤔᤡ ᤂᤥ᤺ᤔᤠᤖᤧ ᤗᤠᤃᤡ ᤂᤢᤏᤧ᤹ ᤋᤥ᤺ᤴᤍᤢᤖᤥ॥
8 ᤛᤣᤛᤣᤔᤠᤱᤅᤡᤸᤗᤧ ᤁᤴ ᤁᤠᤰ ᤐᤠ᤺ᤴᤗᤠᤶᤒᤠ ᤗᤠ᤺ᤰᤁᤠᤳᤐᤠ ᤛᤣᤛᤣᤒᤠ ᤋᤧᤴᤏᤡᤴ ᤏᤧᤖ ᤌᤠᤖᤡᤰ ᤛᤡᤃᤠᤱᤛ᤻ᤔᤠ ᤁᤠᤰᤏᤢ᤺ᤸᤗᤧ ᤛᤣᤛᤣᤒᤠ ᤋᤧᤴᤏᤥ ᤗᤠ᤺ᤵᤔᤠ ᤗᤠᤶᤔᤡᤴ ᤔᤧᤜᤖᤧᤴ ᤑᤠ᤹ᤀᤠᤱ ᤔᤏᤠᤜᤠ᤹ ᤀᤥᤛᤣ᤺ᤴᤎᤠᤰᤋᤢᤛᤡᤖᤥ॥
9 ᤁᤱᤃ ᤀᤠᤀᤡᤴ ᤋᤠ᤺ᤴᤍᤡᤰᤐᤠ ᤕᤧᤶᤔᤡᤴ ᤀᤥᤛᤣ᤺ᤴᤍᤠᤱ ᤁᤧᤈᤥ᤺ᤰᤐᤠ ᤔᤡᤰᤛᤣ᤺ᤴᤗᤥ॥ ᤂᤧᤸᤗᤧᤃ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤍᤥ᤺ᤴᤍᤢᤒᤠ ᤆᤥᤓᤠ᤹ᤀᤡᤴ ᤏᤢ ᤛᤡᤍᤢᤱᤈᤓᤠᤜᤠ᤹ᤖᤧ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤂᤠᤛᤡᤱᤅᤡᤴ ᤛᤢᤳᤌᤥ ᤔᤧᤴᤈᤥᤃᤢᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤀᤠᤎᤠᤰᤗᤥ॥
10 ᤂᤧᤴ ᤐᤠ᤺ᤴᤜᤠ᤹ᤃ ᤆᤠᤔᤠ ᤌᤢᤱᤔᤠ ᤏᤢ ᤐᤖᤡᤰᤐᤖᤡᤰᤐᤠ ᤛᤢᤳᤌᤥ ᤆᤥ᤺ᤰᤛᤡᤱᤔᤠᤖᤧ ᤗᤠᤃᤡ ᤘᤠᤜᤵᤛᤡᤱᤔᤠ ᤌᤡᤶᤖᤰᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤁᤢᤛᤱ ᤔᤧᤴᤈᤥ᤺ᤰᤁᤣ ᤌᤠᤖᤡᤰ ᤂᤧᤱᤜᤠ᤹ᤃ ᤏᤠᤛᤡᤱᤃᤧᤴ ᤌᤰᤁᤥ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤒᤥ᤺ᤱᤒᤠ ᤌᤡᤶᤜᤠ᤹ ᤘᤕᤧᤖᤥ॥
ᤂᤪᤡᤛ᤻ᤋᤧᤴ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤛᤡᤍᤢᤱᤈᤓᤠ
11 ᤁᤧᤖᤧᤰ ᤋᤩᤧ ᤆᤢᤖᤧᤒᤠ ᤏᤢ᤺ᤒᤠ ᤐᤠ᤺ᤴᤜᤠ᤹ ᤁᤧᤒᤡᤒᤠ ᤂᤪᤡᤛ᤻ᤋᤧᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ᤃ ᤐᤕᤶ ᤕᤶᤒᤠ ᤏᤢ ᤁᤢᤛᤠᤱ ᤁᤧᤗ᤺ᤒᤠ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤥ ᤗᤠ᤺ᤛᤧᤖᤥ॥ ᤂᤧᤴ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤡᤴ ᤔᤧᤴᤇᤠᤶ ᤜᤢᤰᤁᤡᤸᤗᤧ ᤆᤥ᤺ᤰᤔᤏᤠᤒᤠ ᤔᤧ᤺ᤴᤗᤥ. ᤐᤠ᤺ᤵᤔᤠᤀᤣ ᤐᤥ᤺ᤱᤅᤡᤸᤗᤧ ᤂᤧᤱᤃ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤸᤗᤧᤴᤏᤠᤱ ᤔᤧ᤺ᤴᤗᤥ॥
12 ᤂᤢᤏᤧ᤹ᤃ ᤔᤧᤴᤍᤠᤰ ᤏᤢ ᤐᤡᤳ ᤔᤠᤰᤂᤡ᤹ᤀᤡᤴ ᤔᤧ᤺ᤴ. ᤁᤖ ᤂᤢᤏᤧ᤹ᤃ ᤛᤍᤠᤍᤡᤱᤗᤧ ᤗᤠᤃᤡ ᤗᤠᤕᤥᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤛᤧ ᤂᤧᤴ ᤁᤠᤰᤏᤢ᤺ᤸᤗᤧ ᤛᤣᤛᤣᤒᤠ ᤋᤧᤴᤏᤥ ᤌᤡᤰᤗᤧᤱᤔᤥ ᤛᤍᤠᤍᤡᤱᤗᤧ ᤗᤠᤃᤡ ᤀᤠᤒᤠᤅᤣ ᤁᤢᤔᤠᤰᤂᤡ᤹ᤀᤡᤴ ᤋᤥ᤺ᤴᤍᤢᤖ ᤗᤠ᤺ᤛᤧᤖᤥ॥
13 ᤔᤧᤴᤍᤠᤰ ᤏᤢ ᤁᤢᤶᤒᤠᤒᤠ ᤐᤡᤳ ᤔᤠᤰᤂᤡ᤹ᤀᤡᤸᤗᤧ ᤛᤠᤱᤔᤠᤛᤡᤸᤗᤧ ᤜᤧᤰᤁᤩᤠᤱ ᤁᤖ᤺ᤱ ᤐᤡᤵᤔᤠ᤺ᤴ ᤀᤥ᤹ᤔᤠᤀᤠᤱ ᤁᤧᤗ᤺ᤶᤒᤠ ᤂᤠᤵᤐᤢ᤺ᤸᤗᤧ ᤀᤠᤛᤢᤳᤌᤥ ᤔᤏᤠᤜᤠ᤹ ᤆᤢ᤺ᤵᤔᤠᤛᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤰᤁᤡᤴ ᤛᤢᤳᤌᤥ ᤐᤥ᤺ᤱᤏᤧ ᤑᤠ᤹ᤃᤪ
14 ᤂᤧᤴᤏᤢ᤺ᤸᤗᤧᤃ ᤂᤪᤡᤛ᤻ᤋᤖᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤀᤠᤰᤂᤩᤠᤰ ᤕᤖᤡᤰ ᤛᤢᤳᤌᤥ ᤀᤠᤈᤥ᤺ᤰ᥄ ᤂᤢᤏᤧ᤹ ᤔᤧᤴᤏᤢᤵᤔᤏᤠᤒᤠ ᤛᤣᤛᤣᤔᤠᤱᤗᤠᤶ ᤁᤢᤛᤠᤱ ᤁᤧᤗ᤺ᤒᤠ ᤛᤡᤍᤢᤱᤈᤓᤠ ᤐᤥ᤺ᤱᤛᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤀᤠᤒᤠᤅᤣ ᤋᤥ᤺ᤴᤇᤡᤱᤗᤥ॥ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥ᤺ᤰᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤁᤢᤔᤠᤰᤂᤡ᤹ᤀᤡᤸᤗᤧ ᤛᤡ᤺ᤔᤧᤴᤏᤥ ᤁᤧᤍᤣ᤹ᤒᤠ ᤕᤠ᤺ᤶᤒᤰᤗᤠᤶ ᤀᤠᤏᤡ᤹ ᤂᤠᤛᤡᤱᤅᤡᤴ ᤛᤢᤳᤌᤥ ᤆᤥᤃᤢ᤹ᤖᤥ॥
15 ᤒᤠ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤔᤧᤴᤏᤢᤵᤔᤏᤠᤒᤠ ᤗᤰᤁᤡᤴ ᤀᤢ᤺ᤳᤋᤢᤛᤡᤒᤠᤜᤠ᤹ᤖᤧ ᤔᤧᤄᤥ᤺ᤛᤢᤖ ᤑᤠ᤹ᤀᤠᤱ ᤂᤪᤡᤛ᤻ᤋᤧᤴ ᤁᤢᤛᤱ ᤔᤠᤱᤜᤢᤵᤗᤧᤴ ᤐᤠ᤺ᤴᤍᤱᤛᤠᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤌᤡᤰᤛᤡᤃᤣ᤺ᤰᤛᤔᤠ ᤔᤠᤱᤜᤢᤵᤐᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤈᤥᤃᤢᤒᤠ ᤗᤠᤕᤥᤗᤠᤶ ᤂᤧᤱᤜᤠ᤹ ᤌᤧ᤹ᤔᤠᤛᤡ ᤑᤠ᤹ᤀᤠᤱ ᤂᤢᤏᤧ᤹ ᤛᤩᤧᤒᤠᤖᤥ॥
16 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤛᤡ᤺ᤀᤠᤸᤗᤧ ᤀᤠᤕᤠᤱᤛᤠᤁᤢᤴᤎᤣ᤺ᤴ ᤂᤢᤏᤧ᤹ ᤂᤥ᤺ᤛᤢ᤹ ᤑᤠ᤹ᤀᤠᤱ ᤆᤥᤃᤢᤒᤠ ᤛᤠᤵᤗᤠ ᤔᤢᤴᤎᤣ᤺ᤱᤃ. ᤂᤧᤴ ᤛᤠᤵᤗᤠ ᤔᤢᤴᤎᤣ ᤁᤧᤛᤠᤵᤐᤠ ᤔᤏᤠ᤺ᤴ ᤛᤩᤧ ᤁᤧᤗ᤹ᤒᤠ ᤐᤷᤔᤠᤱᤃᤡ ᤐᤥ᤺ᤱᤅᤠᤱᤗᤰ ᤛᤧᤰᤂᤠ ᤐᤥ᤺ᤱᤗᤥ॥
17 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤜᤡᤱᤘᤧᤳ ᤘᤠ᤹ᤖ ᤌᤠᤖᤡᤰ ᤂᤧᤴ ᤀᤠᤵᤑᤠᤸᤗᤧᤀᤠᤱ ᤛᤧᤰᤂᤠ ᤔᤧᤒᤥ᤺ᤱᤏᤧᤸᤗᤥ. ᤁᤖ ᤔᤏᤠ᤺ᤴ ᤛᤡ᤺ᤀᤠᤱᤗᤰ ᤛᤧᤰᤂᤠ ᤐᤥ᤺ᤱᤗᤥ॥
18 ᤒᤠ ᤂᤧᤸᤗᤧ ᤆᤥᤃᤢᤸᤗᤧ ᤌᤡᤰᤛᤡᤃᤣ᤺ᤰᤛᤔᤠ ᤔᤠᤱᤜᤢᤵᤐᤡᤴᤏᤠᤱ ᤔᤠᤰᤂᤡ᤹ ᤘᤠᤔᤧᤴᤍᤧ᤺ᤴᤏᤣ ᤌᤠᤖᤡᤰ ᤛᤧᤰᤂᤠ ᤔᤧᤒᤥ᤺ᤱᤏᤧᤸᤗᤥ॥
19 ᤌᤣᤀᤠᤱᤓᤧᤸᤗᤧ ᤔᤥᤛᤠᤖᤧ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤜᤠ᤹ ᤐᤡᤖᤢᤛᤡᤀᤠᤱ ᤂᤧᤸᤗᤧ ᤜᤡᤛᤵ ᤛᤡᤱᤒᤥᤖᤠ᤺ᤰ ᤏᤢ ᤜᤧ᤺ᤰᤁᤧᤗ᤹ᤒᤠ ᤛᤧᤔᤢᤖᤡᤰᤁᤡᤴ ᤆᤫᤠ᤺ᤳᤋᤥ ᤑᤢᤵᤔᤏᤠᤒᤠ ᤐᤡᤳᤛᤠᤳ ᤏᤢ ᤔᤧᤴᤍᤠᤰ ᤔᤠᤰᤂᤡ᤹ᤀᤥ ᤏᤡ᤺ᤵᤛᤢᤀᤠᤱ ᤛᤠᤶᤕᤥᤌᤡᤶ ᤛᤠᤵᤗᤠ ᤏᤢ ᤁᤠᤰ ᤔᤏᤠ ᤛᤶᤍᤠᤱ ᤛᤠᤰᤂᤢᤖᤥ॥
20 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤔᤠᤱᤜᤢᤵᤐᤡᤴ ᤛᤧᤰᤂᤠ ᤁᤧᤈᤥ᤺ᤰᤐᤠ ᤔᤠᤰᤂᤡ᤹ᤀᤡᤴ ᤜᤠᤒᤠ ᤁᤴᤗᤥ॥”
21 ᤜᤧᤰᤁᤣᤗ᤹ᤖᤡᤰᤁᤣ ᤔᤥᤛᤠ᤺ᤸᤗᤧ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤏᤢ ᤛᤣᤘᤠ ᤆᤥ᤺ᤰᤔᤠᤸᤗᤧ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤁᤠᤰ ᤛᤠᤔᤠᤑᤢᤔᤠ ᤛᤶᤍᤠᤱ ᤔᤠᤰᤂᤡ᤹ᤀᤡᤴ ᤛᤠᤰᤂᤢᤖᤥ॥
22 ᤛᤧᤰᤂᤠ᤺ᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤕᤖᤡᤰ ᤁᤢᤛᤡᤰ ᤐᤠ᤺ᤴᤜᤠ᤹ᤃ ᤔᤠᤰᤂᤡ᤹ᤖᤧ ᤛᤢᤳᤌᤥ ᤐᤥ᤺ᤱᤗᤥ. ᤜᤧᤰᤁᤩᤠᤱ ᤔᤠᤰᤂᤡ᤹ ᤘᤠᤔᤧᤴᤍᤧ᤺ᤴᤏᤣᤃ ᤗᤠᤕᤥ᤺ᤴ ᤗᤧᤵᤔᤡ ᤔᤧᤒᤥ᤺ᤱᤏᤧᤸᤗᤥ॥
23 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤜᤧᤰᤋᤱᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠ᤺ᤴᤜᤠ᤹ᤖᤧ ᤁᤢᤒᤡᤜᤠ᤹ ᤛᤣᤛᤣ ᤛᤢᤳᤌᤥ ᤆᤥ᤺ᤰᤔᤠ ᤐᤥ᤺ᤰᤂᤧ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠ᤺ᤴᤜᤠ᤹ᤀᤣ ᤛᤢᤳᤌᤥ ᤆᤥ᤺ᤰᤔᤠ ᤑᤠ᤹ᤀᤠᤱ ᤂᤧᤴᤏᤢ᤺ᤸᤗᤧ ᤏᤢ᤺ᤒᤠ ᤛᤡᤍᤢᤱᤈᤓᤠ᤺ᤴ ᤆᤠᤜᤠᤒᤠ ᤆᤥᤃᤧ॥
24 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤧᤱᤃ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤒᤡ ᤁᤢᤀᤡᤛᤡ᤺ᤰᤐᤠ ᤔᤧᤴᤇᤠᤶ ᤜᤢᤰᤁᤡᤸᤗᤧ ᤆᤥ᤺ᤰᤔᤏᤠ ᤛᤣᤛᤣᤒᤠ ᤋᤧᤴᤏᤥ ᤔᤧᤗᤠ᤺ᤛᤧᤴ. ᤁᤖ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡᤀᤣ ᤀᤠᤏᤡ᤹ ᤗᤠᤃᤡ ᤛᤠᤱᤃᤪᤠᤶᤐᤣᤍᤠᤱᤅᤥ ᤗᤠ᤺ᤛᤧᤖᤥ॥
25 ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤁᤠᤰᤏᤢ᤺ᤸᤗᤧ ᤛᤣᤛᤣᤒᤠ ᤋᤧᤴᤏᤥ ᤋᤱᤒᤣ ᤌᤵᤔᤣ ᤌᤰᤛᤠ ᤔᤠᤰᤂᤡ᤹ᤏᤢ ᤗᤠ᤺ᤛᤧᤒᤠ ᤁᤢᤀᤡᤛᤡ᤺ᤰ ᤂᤪᤡᤛ᤻ᤋᤧᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤗᤠ᤺ᤛᤧᤸᤗᤧ ᤂᤢᤏᤧ᤹ ᤀᤧᤳᤗᤧᤱ ᤀᤠᤒᤠᤅᤣ ᤛᤡᤍᤢᤱᤈᤓᤠ ᤐᤥ᤺ᤱᤛᤧ ᤔᤧᤗᤠ᤺ᤛᤧᤴᤗᤥ॥
26 ᤔᤧ᤺ᤴᤏᤡᤸᤗᤧᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤐᤥ᤺ᤰᤂᤧᤀᤠᤱᤎᤥ ᤂᤢᤏᤧ᤹ ᤕᤖᤡᤰᤗᤧᤱ ᤀᤡᤏᤥᤃᤧᤴ ᤋᤢᤰᤂᤣ ᤆᤠᤔᤠ ᤁᤧᤒᤥ᤺ᤱᤒᤠ ᤘᤕᤧ. ᤁᤖ ᤂᤢᤏᤧ᤹ᤃ ᤁᤴ ᤁᤢᤏᤢᤵᤔᤠ ᤕᤧᤶᤔᤥ ᤕᤖᤡᤰᤗᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤐᤡᤔᤠᤛᤡ ᤑᤠ᤹ᤀᤠᤱ ᤌᤡᤰᤗᤧᤱᤔᤠᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤛᤡᤍᤢᤱᤈᤓᤠ ᤐᤥ᤺ᤰᤂᤧᤖᤥ॥
27 ᤔᤧᤴᤇᤠᤶ ᤕᤠᤵᤔᤡ ᤁᤧᤖᤧᤰ ᤌᤡᤰᤗᤧᤱᤃ ᤛᤡ᤺ᤔᤠ ᤐᤥ᤺ᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤠᤛᤧᤴᤏᤥ ᤕᤧᤵᤔᤠ ᤐᤥ᤺ᤱᤒᤠ ᤁᤢᤀᤡᤛᤡ᤺ᤰ
28 ᤂᤪᤡᤛ᤻ᤋᤧᤴ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤜᤠ᤹ ᤁᤢ᤺ᤛᤧ ᤌᤡᤰᤗᤧᤱᤔᤥ ᤛᤡᤍᤢᤱᤈᤓᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤕᤠᤶᤔᤥ ᤕᤢ᤺ᤸᤗᤧ ᤀᤠᤏᤡ᤹ ᤗᤠᤕᤥᤜᤠ᤹ ᤁᤢ᤺ᤛᤧᤃ ᤔᤧ᤺ᤴ. ᤁᤖ ᤂᤢᤏᤧ᤹ ᤁᤢᤕᤢ᤺ᤔᤠᤴ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤁᤧᤜᤠᤱᤒᤠᤜᤠ᤹ ᤛᤧᤴᤗᤵ ᤐᤡᤛᤧᤏᤧ ᤕᤢ᤺ᤖᤥ॥